अधिकृत व्याख्या :

‘सकल देशांतर्गत उत्पादन’ (GDP) म्हणजे ”एका विशिष्ट कालावधीत (सामान्यतः एक वर्ष) देशाच्या सीमेमध्ये उत्पादित केलेल्या सर्व अंतिम वस्तू आणि सेवांचे एकूण बाजार मूल्य.”

सोप्या शब्दात सांगितलं तर GDP म्हणजे देशात ज्या काही सेवा आणि वस्तू निर्माण होतात त्यांची एकूण MRP किंवा बाजारातील किंमत.

आता… वस्तू आणि सेवा म्हणजे काय हे वरील चित्रा मध्ये पाहून आपण समजू शकतो. वस्तू– गाडी, विमान, लेखणी, मोबाईल, इत्यादींचे उत्पादन आणि सेवा– बँक, विमा कंपन्या, वाहतूक, डॉक्टर, इंजीनीयर यांच्या सेवांचे उत्पादन इ. चा समावेश होतो.

अश्या अंतिम वस्तू आणि सेवा यांचे बाजारातील मूल्य म्हणजेच एका देशाचा GDP होय. इथे ‘अंतिम वस्तू आणि सेवा’ असे म्हटले आहे , फक्त वस्तू आणि सेवा असे वापरले नाही कारण ग्राहक किंवा उपभोक्ता ज्या वस्तू आपल्या स्वतःच्या उपयोगासाठी विकत घेतो अश्या वस्तूंना अंतिम वस्तू म्हणतात आणि अश्याच वस्तूंचा समावेश GDP मोजताना करतात.

उदा.- एक कार बनवतांना रबरचे चाक,स्टील,विजेचा बल्ब,काच, इ. वस्तूंचा वापर होतो पण या सर्व वस्तू अंतिम वस्तू नाहीत तर कार अंतिम वस्तू आहे आणि म्हणून फक्त फायनल जी कार तयार होते तिचा समावेश जी.डी.पी.च्या आकडेवारीत होतो आणि कार बनवताना लागलेल्या सर्व सामान आणि वस्तूंची किंमत फायनल कार मध्ये जोडली जाते.

अश्याप्रकारे प्रत्येक वस्तू आणि सेवा जी ग्राहक स्वतःच्या उपयोगासाठी विकत घेतो तिचा समावेश देशाच्या जी.डी.पी.मध्ये होतो. उदा.- जेव्हा आपण एक काच घरात उपयोगासाठी विकात घेतो तेव्हा तो काच एक अंतिम वस्तू म्हणून गृहीत धरला जाईल

परंतू तोच काच एक कार बनवतांना वापरला जाईल तेव्हा तोच काच एक अंतिम वस्तू नसून ती कार अंतिम वस्तू आहे कारण ग्राहक ती कार विकत घेणार आणि त्या कार च्या किमतीत त्या काचेची पण किंमत अगोदरच जोडलेली असणार.